mardi 22 décembre 2009

يا سيدي بعد السلام مصحوبة بعليكم السّلام، والله مذبيّة نتطرق لموضوع لقيت أنّو يستحقّ التّطرًق إلًي باش يصيرلو، يتناول الموضوع بالأساس القفزة اللي شهدها ميدان الإنتاج الغنائي و بين قوسين بالطّبيعة نحكيو عالعربي بمختلف أصنافو، و منغير منطوّل عليكم .
يا سيدي ولّيت نحسّ بنوع من البهتة و التّبهيمة جراء بعض الأغاني واللي لتو لفهمت شنية علاقتها بالغناء، و مانكذبش عليكم أنا مغروم شوية بالراي و مشتاقاتو، نسمع أغاني حسني و أغاني نصرو ما تيسر من أغاني خالد، أمًا يا خوية نبهت في بعض لعباد على الذوق الزفت إلي تتمتع بيه ولي ما نتصورش أنو جاهم بالساهل، بعدلي كل يوم نسمعو بشاب جديد إكتسحت أغانيه الأسواق، ياسيدي فنان جديد و في طور النمو ؟ والله ماعلينا .. أما تجيبلي كلمات عامية وضيعة منحطة و تلحنها و تغنيها بصوت ظاهرلي نتذكر و أني سمعتو في أحد الزيارات القديمة للبلفيدار ؟ هكاكة يولي علينا.
اليوم و أثناء تصفحي لأحد المواقع المختصة في تحميل الجديد و القديم من أغاني الراي .. نطيحلك بزنس جينيراسيون جديدة جلبت إنتباهي، والله التسميات متاعهم برك من المضحكات المبكيات : الشاب إلياس، الشاب أنيس، الشابة دليلة، الشاب قادر، الشاب الحامي، الشاب قاديرو، الشابة شيراز.. هاذومة بالطبيعة التسميات العادية والوجوه الجديدة.
أما هاو جايكم الضرب الصندي و هاو باش نطلعو شوية للأصناف الغريبة : الشاب الجابوني، الشاب حمامة، الشاب ميمو، الشاب تيجيفي ، الشاب قناطر، الشاب دجاجيرا، الشاب تاوريتي، الشاب موموش، الشابة سمسومة، الشاب لحبيطري ..
و نخرجو من الشباب العلا و نتعداو لصنف الشيوخ و أنا لتو لفهمت بأن وصيفة ينتحلو في شخصية الشيوخ : الشيخ الهامل، الشيخ المرمري، الشيخ مرساديس، الشيخ كريمو، الشيخة جنية، الشيخة حجلا، الشيخة الريميتي..
و نختمو بالصنف إلي لاهم شيوخة و لاهم شباب بالطبيعة نحكي عالتسمية موش عالعمر : فتحي الدزيري، الهندي، حسيبة عمروش، هواري دوفان ، كاتيا الهندية، لا كورنيش ، الميزوني، عثمان بريقو، زينو البارسيان ، و القائمة مازالت تطول .
والله لنزيد عليكم حتى كلمة، هالأشكال هدي كلها تغني راي

و نعملو قفزة صغيرة على بعض العناوين الفنية أو بالأحرى الموسوعة الفنية اللي أنتجتها هالنخبة العريقة :
- ياسيدي الشاب صليح أتحفنا بغناية تحت عنوان صب الرشراش .. أغنية أكثر من رائعة و الدليل العنوان متاعها.
- الشاب عباس أتحفنا بأغنية راني مدمر .. تقول كلمات الأغنية راني مدمر وباغي نهدر و نخفف على روحي شوية .. و ماقديتش القلب تعمر و أبار إنتي إلي تلاجي عليا.
- و أتحفنا الفنان ميمون البركاني بأغنية الصدمة كليتها نهار عرسك .. و بالمناسبة ندعوكم باش تسمعو صوت هالمغني و تعطيوني رايكم و تحاولو تجتهدو و تقولولي يا لندرا صوتو يشبه للمعزة و إلا للعلوش.
- و مازلنا مع الإتحافات والمرة هاذي الشاب ديدين كان سمعتوش بيه يغني ماعلاباليش بيك .. و شوف الكلمات الرائعة والمتجانسة متاع الأغنية .. دڨي دڨي دڨي ماعلاباليش بيك .. تروحي للملاهي ماعلاباليش بيك .. إديري صاحبة جديدة ماعلاباليش بيك .. عندك ما خير منك ما عندي ماندير بيك واااااه.
- و الشاب رضوان غنا ساڨا أفريكا .. تقول كلمات هالأغنية .. نسكر فالليل يا كحلوشة نسكر فالليل .. نسكر فالليل على جالها و نموت عليل.
و منجمش نختم هالقائمة قبل مانحكي على الإتحافات القديمة أمثال الشابة مينوشة و الشاب الزهواني، والأغاني العريقة متاع هاكل الجيل الذهبي و نذكر على سبيل المثال : كلمات الأغنية تقول : والله مانطيق صبر نضرب صدري بالحجر، و الأغنية لخرى تقول إسقيني يا ساقي و عمرلي الكاس .

بحيث تحس روحك عايش في ميزيرية كلبة ماعندها حتى حل والعياذ بالله.
يا لسياد رانا حكينا كان على صنف واحد مالغناء ولي هوة الراي .. خلي عاد كان باش ندور للمهازل الشرقية بجميع أصنافها ؟
إمالة خلي عزاها سكات و ياحصرة على زمان بوعنبة و كيما يقولوها : سعدك يا لطرش.